【自助餐放蛇起底组】$178放题玩3P 烧肉 x 蒸气火锅
2020-06-13
蒸气火锅 近排咁hit，斋食都要百几二百蚊，今次呢间餐厅，两个钟内俾你任食烧肉、日式料理，仲送多个海鲜 蒸气火锅 ，平日$178就有交易，哇！玩匀3样嘢，两个钟够唔够时间食呢？立即去片！
一口和牛任食 怪味腌酱鸡猪肉
烧肉係以划纸仔形式落单，肉类有牛舌、牛仔骨、黑豚肉、猪颈肉、鸡翼、羊鞍，最估唔到有「一口和牛任食」！仲有海鲜同蔬菜类，例如海中虾、青口等，望落好丰富！落咗单之后等5分钟都嚟齐，同埋都执啱份量。
味道嚟讲，盐烧一口和牛、孜然牛舌同羊鞍都唔错，不过声称有芝士、蜜糖、香草嘅肉类就认真麻麻，唔係无味就有阵怪酸！叫咗两转烧肉都已经用咗一个钟去食，得返一个钟食题同埋蒸气火锅！妈~好急呀~~~转个头见到有枱，5个人可开两个炉，咁就可以烤肉、蒸气锅同步进行，正呀~~
肉类、海鲜都係任叫任食。
如果2-3人入座，得一个炉，要食完烧肉先可食蒸气锅，急唔来~
盐烧安格斯一口和牛有惊喜，入口鬆化，好嫩滑！一个人要食返十几粒先够！
孜然美国牛舌都唔错，好爽弹，都可以丧encore！
香草纽西兰羊鞍虽然无香草味，但都好鬆化好香口。
海中虾都好大只、弹牙。
伏嘢嚟啦！香草酱鸡扒真係唔多掂，香草酱有阵奇怪嘅酸味，哇！难食到吞唔落！
芝士黑豚肉其实都係上碟时放一堆芝士粉係黑豚肉上面，烧个时都好易燶，要留心~同埋食落係唔觉有芝士味嘅！另外蜜糖手羽先都係无蜜糖味！日式料理选择多 不过味道就……
日式放题同平时食开嘅放题一样咁多种类，有刺身、寿司、手卷、炸物、天妇罗、和食料理等，选择一啲都唔hea，不过正当以为可丧食刺身之际，发现三文鱼无味，吞拿鱼又多筋，得炸物同天妇罗好啲咋，其他真係…….
同烧肉一样，都係tick纸仔落单，选择同平时日式放题一样多。
刺身味道就……主要係无味啦~~~~三文鱼无味之余仲有筋；油甘鱼无乜鱼油；吞拿鱼就最伏，多筋到喊！！！
带子鹅肝寿司!鹅肝超超超细粒，好似手指尾指甲咁大，细到一入口唔知飘咗去边。
天妇罗同炸物都ok嘅，都炸得香脆。
忌廉薯饼炸得也香口。
放题少有嘅川辣鸡翼尖，一入口劲辣好刺激，不过鸡翼尖口感好霉好霉，我真係食咗一只就放返低。
饮品任饮，有汽水+啤酒。蒸气火锅 海鲜任攞 不过……
食完烧肉，其实都可以叫店员们帮你换上蒸气火锅，放係底部嘅唔係清水，而係胡椒鹹菜猪肚汤；而蒸气火锅嘅配料係自助嘅，可以入去任夹海鲜，有海虾、东风螺同蚬等。
蒸气火锅同烧肉都係用同一个炉。
蒸气火锅啲配料一眼望晒，全部都係海鲜。
青口肉质霉，而且好腥！另外东风螺食落好唔新鲜，同埋太鹹!
食完海鲜试下吸晒海鲜精华个汤，um……我觉得呢个唔可以叫做胡椒鹹菜猪肚汤，可以改名叫做胡椒水，都唔入味！
总结：虽然$178呢个价钱可以食到烧肉＋蒸气火锅＋日式放题，食法和食物选择真係好丰富，不过味道方面就真係唔多理想，得烧肉个part可以狂encore，同埋如果要係两个钟里面食匀三样放题，真係要自己睇住时间(不过如果你多人有得坐大枱有两个炉咁就会好啲)，多半个钟要舒服啲！环境方面都好阔落，但抽风系统似乎唔係几work，食完都有一阵味；服务都ok，店员们都有主动执碟同上菜速度都快手。
总分：6/10 
板烧郎烧肉铁板放题料理专门店
地址: 佐敦白加士街66号新宝广场5楼全层(显示地图)
电话：3543 1183
放题供应时间: 5pm-2am
$178放题供应时间:星期一至四 5:30pm-6:00入座
收费:成人:$178、小童:$138
用餐时间:入座时间起计2小时
备注:收加一
延伸阅读:
【自助餐放蛇起底组】九龙湾工业区 $118任食繁忙蒸气锅
【自助餐放蛇起底组】$188日式放题 自助甜品区+送生蚝
上一篇：【自助餐放蛇起底组】$168韩烧 炸鸡小食任食
下一篇：【自助餐放蛇起底组】$188日式放题 自助甜品区+送生蚝